លោក មាស សុភាព ប្រធានមន្ទីរកសិកម្មខេត្តកោះកុង ត្រូវបានបែកធ្លាយរឿងអាស្រូវថា បានលួចដីរដ្ឋរបស់មន្ទីរលក់
11-June-2016 | ដោយ មែន កំសត់
ខេត្តកោះកុង ៖ លោក មាស សុភាព ប្រធានមន្ទីរកសិកម្មខេត្តកោះកុង ត្រូវបានបែកធ្លាយរឿងអាស្រូវថា បានលួចដីរដ្ឋរបស់មន្ទីរលក់បានប្រាក់ប្រមាណជាង៣សែនដុល្លារ រួចសម្ងំស្ងាត់ឈឹងធ្វើដូចចោរលួចសេះ ។ រឿងអាស្រូវនេះត្រូវបានបែកធ្លាយដោយសារតែមន្ត្រីក្រោមឱវាទច្រើន នាក់បានដាក់ពាក្យបណ្តឹងទៅក្រសួងកសិកម្ម ដែលជាអាណាព្យាបាលរបស់ខ្លួន ហើយលោករដ្ឋមន្ត្រីដែលឡើងថ្មី វេង សាខុន ក៏បានចេញលិខិតបេសកកម្មចំនួន២ស្ទួនគ្នា ទី១លិខិតចុះថ្ងៃទី៣១ ឧសភា ២០១៦ ចាត់តាំងលោក គឹម សុន អគារធិការនៃអគារធិការដ្ឋាន និងមន្ត្រីក្រោមឱវាទចំនួន៤នាក់ ។ លិខិតមួយទៀត ចុះថ្ងៃទី២ មិថុនា ២០១៦ ចាត់តាំងលោក អ៊ុល នទី ប្រធានការិយាល័យទ្រព្យរដ្ឋ នៃនាយកដ្ឋានគណនេយ្យ ហិរញ្ញវត្ថុ និងមន្ត្រីក្រោមឱវាទម្នាក់ ដើម្បីចុះអង្កេតស្រាវជ្រាវករណីបណ្តឹងលក់ដី ដែលមានកត់ត្រាក្នុងបញ្ជីសារពើភ័ណ្ឌទ្រព្យសម្បត្តិរដ្ឋរបស់មន្ទីរ កសិកម្មខេត្តកោះកុង ។
នៅថ្ងៃទី៣ មិថុនា ២០១៦ ក្រុមការងារអធិការកិច្ចនៃក្រសួងកសិកម្មក៏បានចុះមក និងធ្វើការសាកសួរមន្ត្រីទាំងអស់ របស់មន្ទីរកសិកម្មខេត្តកោះកុងម្នាក់ម្តងៗ ។ មន្ត្រីទាំងនោះ មិនត្រឹមតែបកស្រាយការពិតឱ្យក្រុមអធិការកិច្ច បានដឹងប៉ុណ្ណោះទេ គឺក្រុមមន្ត្រីក៏បានបង្ហើបឱ្យបានដឹងដែរថា ដីដែលលោកប្រធានលួចលក់ស្ងាត់ៗនេះ គឺមានទំហំស្មើនឹង៣០អា៤១សង្ទីអា ស្ថិតនៅជាប់ផ្លូវជាតិលេខ៤៨ ស្ថិតក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ។ ពួកគេថាលក់ឱ្យទៅឈ្មោះ ជា លាងហេង ជាម្ចាស់ក្លិបជល់មាន់ និងយូគី ដ៏ល្បីល្បាញនៅក្នុងអាណាចក្រកោះកុង ។ប្រភពដដែលបានបង្ហើបទៀតថា ដីខាងលើនេះ ត្រូវបានលោកប្រធានលួចលក់តាំងពីថ្ងៃទី១៧ មិថុនា ២០១៥ បើគិតមកដល់ពេលនេះ គឺមានរយៈពេលមួយឆ្នាំហើយ ។
ប្រភពដដែលបាន បន្តថា មូលហេតុដែលថ្នាក់លើមិនបានដឹងពីករណីលួចលក់ដីរដ្ឋនេះ គឺដោយសារឯកសារលក់ទិញ លោកប្រធានមន្ទីរមិនបានរត់ឯកសារឆ្លងកាត់មន្ទីរសេដ្ឋកិច្ច និងហិរញ្ញវត្ថុខេត្តទេ គឺលោកប្រធានឃុបឃិតគ្នា តែជាមួយអាជ្ញាធរ ក្រុងខេមរភូមិន្ទ ប្រធានការិយាល័យភូមិបាលក្រុង និងប្រធានមន្ទីររៀបចំដែនដី នគរូបនីយកម្ម និងសំណង់ខេត្ត តែប៉ុណ្ណោះ សង្ស័យលោក ហាក់ បូរ៉ា ប្រធានការិយាល័យភូមិបាលក្រុងខេមរភូមិន្ទ កំពុងជាប់ពាក់ព័ន្ធដីធ្លីធ្ងន់ធ្ងរដែរ ។
ប្រភពផ្ទៃក្នុងបានទម្លាយឱ្យដឹងទៀតថា បន្ទាប់ពីក្រុមមន្ត្រីអធិការកិច្ច និងប្រធានការិយាល័យទ្រព្យរដ្ឋនៃក្រសួងក្រសួងកសិកម្ម ចុះស្រាវជ្រាវរកឃើញបទល្មើសទាំងនេះហើយ ទើបនៅយប់ថ្ងៃទី៨ មិថុនា ២០១៦ លោកប្រធានមន្ទីរបានជួលកម្មករឱ្យទៅវាយកម្ទេចបង្គោលរបងខណ្ឌចែកដី ដែលបានលួចលក់ និងដីនៅសល់ចោល ដើម្បីបំភ័ន្តភ្នែកក្រុមការងារថ្នាក់ខេត្ត ត្រូវចុះទៅវាស់វែងនៅព្រឹកថ្ងៃទី៩ មិថុនា ២០១៦ ឱ្យមើលទៅឃើញទ្រង់ទ្រាយដីឡូត៍តែមួយដូចដើមវិញ ដើម្បីបំភ័ន្តភ្នែកអ្នកសារព័ត៌មាន និងក្រុមការងារ ។
ប្រភពខាងលើបានបន្តថា ទោះបីលោក មាស សុភាព ប្រធានមន្ទីរបានសារភាពចំពោះមុខក្រុមអធិការកិច្ចក្រសួងក៏ពិតមែន ហើយរឿងអាស្រូវត្រូវបានបែកធ្លាយយ៉ាងអសោចិ៍ តែនៅចំពោះមុខមន្ត្រីក្រោមឱវាទលោកប្រធានរូបនេះនៅតែធ្វើខ្លួនដូច អត់ដឹងរឿងអី្វសោះ ហើយប្រាប់កូនចៅថា ខ្ញុំអត់ដឹងអីទេ ។ ទោះជាយ៉ាងណាក៏ដោយ ដំរីងាប់ មិនអាចយកចង្អេបាំងជិតឡើយ ចាំមើលលោកប្រធានរត់ចេញច្រកណា ?
បានព្យាយាមទំនាក់ទំនងលោក ហាក់ បូរ៉ា ប្រធានការិយាល័យភូមិបាលក្រុងខេមរភូមិន្ទ និងលោក រស់ វីរ៉ាវុធ ប្រធានមន្ទីររៀបចំដែនដីនគរូបនីយកម្ម និងសំណង់ ដើម្បីសុំការបំភ្លឺ តែទូរស័ព្ទចូល អត់មានអ្នកទទួល ។ ប៉ុន្តែលោក ធូ វិបុល អភិបាលក្រុងខេមរភូមិន្ទ និងលោក ទេព វីស្កល ប្រធានមន្ទីរសេដ្ឋកិច្ច និងហិរញ្ញវត្ថុ បានបដិសេធថា អត់បានដឹងរឿងនេះទេ ។
លោក ផុន លីវីរៈ អភិបាលរងខេត្ត និងអតីតជាប្រធានមន្ទីរកសិកម្ម មុនលោក មាស សុភាព ហើយដែលកូនចៅគោរពស្រឡាញ់គ្រាប់គ្នានោះ បានប្រាប់កោះសន្តិភាពនៅព្រឹកថ្ងៃទី៩ មិថុនា ២០១៦ ថា ដីមន្ទីរនេះ លោកធ្លាប់ប្រគល់ឱ្យការិយាល័យជលផល ដើម្បីសាងសង់ការិយាល័យរបស់ខ្លួនដោយឡែក តែដោយកាលណោះគ្មានទឹក គ្មានភ្លើងទៅដល់ ក៏ចេះតែនៅទំនេររហូតទៅ ហើយអ្នកដែលហ៊ានកាត់ដីនេះលក់ ទោះបីអ្នកលក់ប្រគល់លុយឱ្យអ្នកទិញ ហើយយកដីឱ្យរដ្ឋវិញ ក៏ត្រូវទទួលទោសទណ្ឌដែរ មិនអាចរួចខ្លួនពីផ្លូវច្បាប់ឡើយ ។
ក្រុមអ្នកវិភាគយល់ឃើញថា សម័យនេះហើយមិនគួរមានមន្ត្រីថ្លើមធំហ៊ានយកដីទំនេររបស់ក្រសួង មន្ទីរលក់ដូចលក់ត្រីបែបនេះសោះ ។ ចាំមើលទៀត តើជាសម្លកំពិសដែរឬអត់ ?៕
ចំនួនអ្នកទស្សនា
- ថ្ងៃនេះ5711
- ម្សិលមិញ14181
- សប្តាហ៍នេះ5711
- ខែនេះ120861
- ឆ្នាំនេះ120861
- សរុប20563317